শেহতীয়া খবৰ
Home / ক্ৰীড়া / আজি গুৱাহাটীত উপস্থিত হ’ব বিৰাট কোহলি নেতৃত্বাধীন টীম ইণ্ডিয়া

আজি গুৱাহাটীত উপস্থিত হ’ব বিৰাট কোহলি নেতৃত্বাধীন টীম ইণ্ডিয়া

ডিজিটেল ডেস্কঃ ২১ অক্টোবৰত বৰ্ষাপাৰা ক্রিকেট ষ্টেডিয়ামত অনুষ্ঠিত হ’ব প্ৰথমখন আন্তঃৰাষ্ট্ৰীয় এদিনীয়া মেচ। মেচখনত ঘৰুৱা দল ভাৰতৰ বিপক্ষে মুখামুখি হ’ব ৱেষ্ট ইণ্ডিজ। আৰু সেই উদ্দেশ্যেই আজি গুৱাহাটীত উপস্থিত হ’ব বিৰাট কোহলি নেতৃ্ত্বাধীন টীম ইণ্ডিয়া। জানিব পৰা মতে ভাৰতীয় দলটো দুপৰীয়া ১ বজাত বৰঝাৰ বিমান বন্দৰত উপস্থিত হ’ব আৰু তাৰ পৰাই পোনে পোনে হোটেল ৰেডিছন ব্লুলৈ ৰাওনা হ’ব। উল্লেখ্য যে আলহী দল ৱেষ্ট ইণ্ডিজৰ সাতগৰাকী খেলুৱৈ সোমবাৰতে গুৱাহাটীত উপস্থিত হৈছে আৰু বাকী কেইজন সদস্য আজি ভাৰতীয় টীমৰ সৈতে একেলগে আহিব।

সোমবাৰে হায়দৰাবাদৰ পৰা বিশেষ বিমানেৰে গুৱাহাটীত উপস্থিত হোৱা ৱেষ্ট ইণ্ডিজ ক্ৰিকেট দলটোৰ সদস্য কেইগৰাকী হ’ল এছলে নাৰ্ছ, মাৰ্লন ছেমুৱেলছ, চন্দৰপল হেমৰাজ, অ’বেদ মেককয়, ফেবিয়ান এলেন, ওছানে থমাছ আৰু ৰ’ভমান পাৱেল।  এই সাতগৰাকী খেলুৱৈয়ে আজি বিয়লি অনুশীলনত নামিব বুলি জানিব পৰা গৈছে। আনহাতে আজি গুৱাহাটীত উপস্থিত হ’বলগীয়া ভাৰতীয় দলটোৱে কাইলৈহে বৰ্ষাপাৰা ক্ৰিকেট ষ্টেডিয়ামত অনুশীলনত অংশ ল’ব। উল্লেখযোগ্য যে ভাৰত-ৱেষ্ট ইণ্ডিজৰ মাজত অনুষ্ঠিত হ’বলগীয়া এদিনীয়া শৃংখলাটোৰ প্ৰথমখন মেচৰ বাবে গুৱাহাটীৰ নিৰাপত্তা ব্যৱস্থা কটকটীয়া কৰি তোলাৰ লগতে দুয়োটা দলৰ খেলুৱৈসকলৰ বাবে জেড পৰ্যায়ৰ নিৰাপত্তা ব্যৱস্থা কৰা হৈছে। ইফালে মেচখনৰ বাবে অসম ক্ৰিকেট সন্থা সম্পূৰ্ণৰূপে সাজু হৈ উঠিছে।