শেহতীয়া খবৰ
Home / আঞ্চলিক / ছয় জনগোষ্ঠীৰ জনজাতিকৰণৰ বিৰোধিতাৰে আহ্বান দিয়া অসম বন্ধৰ মিশ্ৰিত প্ৰভাৱ

ছয় জনগোষ্ঠীৰ জনজাতিকৰণৰ বিৰোধিতাৰে আহ্বান দিয়া অসম বন্ধৰ মিশ্ৰিত প্ৰভাৱ

ডিজিটেল সংবাদঃ চৰকাৰে অসমৰ প্ৰকৃত জনজাতিসকলক সকলো প্ৰকাৰে নিঃশেষ কৰাৰ ষড়যন্ত্রত লিপ্ত হোৱাৰ অভিযোগ তুলি আজি জনজাতি যুটীয়া সংঘ (CCTOA)ৰ ১২ ঘন্টীয়া অসম বন্ধৰ ৰাজ্যখনত মিশ্ৰিত প্ৰভাৱ পৰিছে। কোকৰাঝাৰৰ লগতে নামনি অসমৰ জিলাকেইখনত বন্ধৰ প্ৰভাৱ পৰাৰ বিপৰীতে ৰাজ্যৰ আন অংশত বন্ধৰ প্ৰভাৱ সীমিত হোৱা দেখা গৈছে। ছয় জনগোষ্ঠীৰ জনজাতিকৰণৰ সিদ্ধান্ত বাতিলৰ দাবীত আহ্বান দিয়া অসম বন্ধৰ প্ৰভাৱ গুৱাহাটী মহানগৰীত পৰিলক্ষিত হোৱা নাই। যান-বাহন চলাচলকে ধৰি দোকান-পোহাৰ আদি খোলা থকাৰ লগতে স্বাভাৱিক জীৱন যাত্ৰাও অব্যাহত আছে।

আনহাতে, বি টি এ ডিত অসম বন্ধৰ প্ৰভাৱ পৰিলক্ষিত হৈছে। কোকৰাঝাৰ, বাক্সা, চিৰাং আৰু ওদালগুৰি জিলাৰ বিভিন্ন প্ৰান্তত বন্ধ সমৰ্থনকাৰীসকলে ৰাজপথত টায়াৰ জ্বলাই প্ৰতিবাদ সাব্যস্ত কৰা দেখা যায়। ছয় জনগোষ্ঠীক জনজাতিকৰণ বাতিলৰ প্ৰতিবাদত জাগীৰোড উত্তাল হৈ পৰিছে। জাগীৰোডত ১২ ঘণ্টীয়া অসম বন্ধৰ প্ৰভাৱ সৰ্বাত্মক হোৱা দেখা গৈছে। বন্ধ সমৰ্থনকাৰী প্ৰতিবাদকাৰীসকলে ৰাষ্ট্ৰীয় ঘাইপথত টায়াৰ জ্বলাই প্ৰতিবাদ সাব্যস্ত কৰে।

ইপিনে, ছয় জনগোষ্ঠীৰ জনজাতিকৰণৰ সিদ্ধান্ত আৰু লগতে নাগৰিকত্ব সংশোধনী বিধেয়ক বাতিল কৰাৰ দাবীত ডিমাচা ষ্টুডেণ্ট ইউনিয়ন, আডছুকে ধৰি সাতোটাকৈ ছাত্ৰ সংগঠনে আহ্বান জনোৱা ১২ ঘণ্টীয়া ডিমা হাছাও বন্ধ সৰ্বাত্মক বুলি জানিব পৰা গৈছে।জিলাখনৰ হাফলঙকে ধৰি মহকুমা সদৰ মাইবাং, দিয়ুংব্ৰা, উমৰাঙছু, লাংটিং, মাহুৰ, হাতিখালী, হাৰাংগাজাও আদি ঠাইসমূহত বন্ধৰ ব্যাপক প্ৰভাৱ পৰিছে।