শেহতীয়া খবৰ
Home / ৰাষ্ট্ৰীয়-আন্তঃৰাষ্ট্ৰীয় / নাগৰিকত্ব বিধেয়ক গৃহীত নহ’ল; ৰাজ্যসভাৰ অধিৱেশন অনিৰ্দিষ্ট কাললৈ স্থগিত

নাগৰিকত্ব বিধেয়ক গৃহীত নহ’ল; ৰাজ্যসভাৰ অধিৱেশন অনিৰ্দিষ্ট কাললৈ স্থগিত

সংবিধানৰ ধৰ্মনিৰপেক্ষতা, গণতন্ত্ৰলৈ সাময়িক সকাহত স্বস্তি লাভ অসাম্প্ৰদায়িক শক্তিৰ

ডিজিটেল সংবাদঃ অসমৰ জনগণৰ নিৰন্তৰ শংকাৰ কাৰণ নাগৰিকত্ব সংশোধনী বিধেয়কখন উত্থাপন নোহোৱাকৈয়ে আজি ৰাজ্যসভাৰ অধিৱেশন অনিৰ্দিষ্ট কালৰ বাবে স্থগিত ৰাখে অধ্যক্ষ ভেংকায়া নাইডুৱে। বহুতো কাৰ্য্যক্ৰমণিকা আধৰুৱা কৰি ১২.৫০ বজাত অধিৱেশন স্থগিত ৰখাৰ লগে লগে উৎকণ্ঠাৰে ঘটনাপ্ৰৱাহ লক্ষ কৰি থকা অসমৰ তথা উত্তৰ-পূবৰ জনগণে সাময়িকভাৱে হ’লেও স্বস্তিৰ নিঃশ্বাস পেলাইছে। অৱশ্যে বিজেপিৰ এই পশ্চাদগমন এতিয়াও ৰহস্যত। কি কাৰণে এইদৰে ৰাজ্যসভাৰ অধিৱেশন আকস্মিকভাৱে স্থগিত ৰাখি বিজেপিয়ে ইয়াৰ লক্ষ্যক খেদাৰ পৰা বিৰত থাকিল সেয়া স্পষ্ট হোৱা নাই। আগন্তুক লোকসভা নিৰ্বাচনৰ পূৰ্বে হিন্দু বাংলাদেশীৰ প্ৰতি অনুকম্পা প্ৰদৰ্শনৰ সুযোগ এৰি দিয়া বিজেপিৰ এই স্থিতি এতিয়াও দুৰ্বোধ্য হৈ আছে।

উল্লেখযোগ্য যে কালি উত্থাপনৰ লক্ষ্য লৈও ব্যৰ্থ হোৱাৰ পিছত আজি বিতৰ্কিত নাগৰিকত্ব সংশোধনী বিধেয়কখন উত্থাপন কৰাৰ পুনৰ লক্ষ্য লৈছিল বিজেপি চৰকাৰে। ৰাজ্যসভাত গৃহ মন্ত্ৰীকে ধৰি প্ৰায় সকলো উপস্থিত আছিল পুৱাৰে পৰা। আনহাতে বিৰোধীয়েও আজি বিধেয়কখন প্ৰতিৰোধ কৰিবলৈ সন্মিলিতভাৱে প্ৰস্তুত হৈ আছিল। গতিকে বিধেয়কখন উত্থাপন হ’লেও আজি ইয়াক পাছ কৰাত বিজেপি বিফল হোৱাৰ সম্ভাৱনাই আছিল বেছি। সেয়া যি নহওক, সংবিধানৰ ধৰ্মনিৰপেক্ষতা, গণতন্ত্ৰলৈ এইদৰেই সাময়িক সকাহ অহাত স্বস্তিৰ নিঃশ্বাস পেলাইছে অসাম্প্ৰদায়িক শক্তিবোৰে।