শেহতীয়া খবৰ
Home / আঞ্চলিক / নাটকৰ অন্ত পেলাই অৱশেষত বিজেপি আৰু অগপৰ মিত্ৰতাৰ সিদ্ধান্ত

নাটকৰ অন্ত পেলাই অৱশেষত বিজেপি আৰু অগপৰ মিত্ৰতাৰ সিদ্ধান্ত

ডিজিটেল সংবাদ, গুৱাহাটীঃ ৰাজ্য বাসীক কিছুদিনৰ বাবে মিছা নাটক দেখুৱাই অৱশেষত আগন্তুক লোকসভা নিৰ্বাচনত প্ৰতিদ্বন্দ্বিতা কৰাৰ ক্ষেত্ৰত মিত্ৰতা চূড়ান্ত হ’ল ভাৰতীয় জনতা পাৰ্টি আৰু অসম গণ পৰিষদৰ। মঙলবাৰে নিশা বিজেপিৰ ৰাষ্ট্ৰীয় সাধাৰণ সম্পাদক ৰাম মাধৱৰ উপস্থিতিত বিজেপিৰ ৰাজ্যিক সমিতি আৰু অগপৰ ৰাজ্যিক সমিতিৰ বৈঠকৰ অন্তত মিত্ৰতাৰ সিদ্ধান্ত গ্ৰহণ কৰা হয়। গুৱাহাটীৰ ৰেডিছন ব্লু হোটেলত অনুষ্ঠিত বৈঠকত উপস্থিত থাকে অসমৰ মুখ্য মন্ত্ৰী সৰ্বানন্দ সোণোৱাল, বিত্ত মন্ত্ৰী হিমন্ত বিশ্ব শৰ্মা আৰু ৰাজ্যিক বিজেপিৰ সভাপতি ৰঞ্জিৎ দাস। আনহাতে অগপৰ সভাপতি অতুল বৰা, কেশৱ মহন্ত আৰু বীৰেন্দ্ৰ প্ৰসাদ বৈশ্যই বৈঠকত অংশগ্ৰহণ কৰে।

বৈঠকৰ অন্তত সাংবাদিকৰে হোৱা মুখামুখিত ৰাম মাধৱে বিজেপি, অগপ আৰু বি বি এফে একেলগে ৰাজ্যত মিত্ৰজোঁটৰ চৰকাৰ চলাই আছে বুলি উল্লেখ কৰি আগন্তুক লোকসভা নিৰ্বাচনতো মিত্ৰ দল হিচাপেই নিৰ্বাচনত প্ৰতিদ্বন্দ্বিতা কৰিব বুলি উল্লেখ কৰে।আনহাতে, অগপৰ লগত আসন বুজাবুজিৰ ক্ষেত্ৰত সাংবাদিকে সোধা প্ৰশ্নৰ উত্তৰত বিজেপিৰ ৰাষ্ট্ৰীয় সাধাৰণ সম্পাদক জনে দুয়োটা দলৰ ৰাজ্যিক নেতৃত্বই পৰৱৰ্তী সময়ত এই সম্পৰ্কত সিদ্ধান্ত ল’ব বুলি জনায়। ৰাম মাধৱে অসম মন্ত্ৰী সভাৰ পৰা পদত্যাগ কৰা অগপৰ মন্ত্ৰীসকলক শীঘ্ৰে দায়িত্বভাৰ লোৱাৰ বাবেও অনুৰোধ কৰে। অগপৰ সভাপতি অতুল বৰাই সাংবাদিকৰ আগত কংগ্ৰেছক পৰভূত কৰাৰ স্বাৰ্থতে বিজেপিৰ লগত মিত্ৰতা কৰা বুলি মন্তব্য কৰি বৈঠক সফল হোৱা বুলি কয়।