শেহতীয়া খবৰ
Home / আঞ্চলিক / আৰ পি শৰ্মাৰ ওপৰত ব্যৱস্থা ল’বলৈ অমিত শ্বাহক অভিযোগ জনাব ৰঞ্জিত দাসে

আৰ পি শৰ্মাৰ ওপৰত ব্যৱস্থা ল’বলৈ অমিত শ্বাহক অভিযোগ জনাব ৰঞ্জিত দাসে

ডিজিটেল সংবাদ, গুৱাহাটীঃ লোকসভা নিৰ্বাচনৰ সময়ত টিকত বঞ্চিত হৈ নিৰ্বাচনৰ সময়ত দলক কোনোধৰণে সহায় নকাৰৰ বিপৰীতে প্ৰায়ে দল বিৰোধী মন্তব্য দি বিজেপিক আক্ৰমন কৰা তেজপুৰৰ সাংসদ আৰ পি শৰ্মাৰ বিৰুদ্ধে ৰাষ্ট্ৰীয় সভাপতি অমিত শ্বাহৰ ওচৰত অভিযোগ দাখিল কৰিব ৰাজ্যিক বিজেপিৰ সভাপতি ৰঞ্জিত কুমাৰ দাসে।

বৃহস্পতিবাৰে সংবাদ মাধ্যমৰ আগত দাসে কয় যে দলীয় নেতৃত্বই আৰ পি শৰ্মাৰ অভব্য দল বিৰোধী আচৰণ প্ৰতক্ষ্য কৰি আছে আৰু শীঘ্ৰে শৰ্মাৰ বিৰুদ্ধে দলে কাৰ্য্যব্যৱস্থা গ্ৰহণ কৰিব। শৰ্মা বৰ্তমান সাংসদ হিচাপে থকাৰ বাবে ৰাজ্যিক বিজেপিৰ সভাপতিয়ে তেওঁৰ বিৰুদ্ধে কোনোধৰণৰ ব্যৱস্থা ল’ব নোৱাৰে বুলি বিজেপিৰ সভাপতিগৰাকীয়ে উল্লেখ কৰি এই ক্ষেত্ৰত অমিত শ্বাহে সিদ্ধান্ত ল’ব বুলি কয়।

উল্লেখযোগ্য যে, এইবাৰ নিৰ্বাচনত বিজেপিয়ে তেজপুৰ লোকসভা সমষ্টিৰ পৰা আৰ পি শৰ্মাৰ পৰিবৰ্তে পল্লৱ লোচন দাসক প্ৰাৰ্থিত্ব প্ৰদান কৰিছিল। প্ৰাৰ্থিত্বৰ পৰা বঞ্চিত হোৱাৰ পাছৰে পৰা শৰ্মাই ৰাজ্যিক বিজেপিৰ নেতৃত্ব মূলত হিমন্ত বিশ্ব শৰ্মা আৰু ৰঞ্জিত দাসক আক্ৰমণৰ লক্ষ্য কৰি লৈছিল। শেহতীয়াকৈ ৰাজ্যিক বিজেপিৰ সভাপতিগৰাকীৰ আৰ পি শৰ্মাৰ বিৰুদ্ধে লোৱা স্থিতিয়ে বিজেপিৰ আভ্যন্তৰীণত চলি থকা বিতৰ্কক অধিক আকৰ্ষণীয় কৰি তুলিছে।