Home Main Stories অসমৰ সকলো দুখীয়া বৃদ্ধ আৰু বিধৱাই প্ৰকৃত নিয়ম অনুসৰি পেঞ্চন লাভ কৰিব...

অসমৰ সকলো দুখীয়া বৃদ্ধ আৰু বিধৱাই প্ৰকৃত নিয়ম অনুসৰি পেঞ্চন লাভ কৰিব : ভৱানীপুৰ সমষ্টিত নতুন উন্নয়ন খণ্ডৰ কাৰ্যালয় উদ্বোধনী অনুষ্ঠানত মন্ত্ৰী ৰঞ্জিত কুমাৰ দাস

394
0

” শ্বহীদ খৰ্গেশ্বৰ তালুকদাৰৰ আত্মাই শান্তি পাব ভৱানীপুৰ সমষ্টিৰ সৰ্বদিশৰ উন্নয়ন হ’লেহে ” – বিধায়ক ফণী তালুকদাৰ

সঞ্জীৱ দাস, ভৱানীপুৰ,২ ডিচেম্বৰ :  “অসমত পঞ্চায়ত, গ্ৰামোন্নয়ন বিভাগ সম্পূৰ্ণ দুৰ্নীতিমুক্ত হ’বলৈ গৈ আছে।বিভাগটোৰ ওপৰত থকা দীৰ্ঘদিনীয়া বদনামবোৰ আতৰ কৰা প্ৰক্ৰিয়া আৰম্ভ হৈছে।পঞ্চায়তৰ প্ৰতিনিধিক, পঞ্চায়ত গ্ৰামোন্নয়ন বিভাগত দুৰ্নীতি চলাবলৈ দিয়া নহ’ব। পঞ্চায়ত প্ৰতিনিধিয়ে দুৰ্নীতি কৰিলে, দুৰ্নীতিগ্ৰস্থ পঞ্চায়ত প্ৰতিনিধিৰ বিৰুদ্ধে বিডিঅ’ বা প্ৰশাসনিকভাৱে তদন্ত কৰক আৰু এজাহাৰ দাখিল কৰক। পঞ্চায়ত আৰু গ্ৰামোন্নয়নৰ জৰিয়তে গাঁৱৰ উন্নয়ন হ’ব লাগিব।’ -এইদৰে কয় অসমৰ পঞ্চায়ত আৰু গ্ৰামোন্নয়ন বিভাগৰ মন্ত্ৰী ৰঞ্জিত কুমাৰ দাসে তেওঁৰ ভাষণত আজি ভৱানীপুৰ বিধানসভা সমষ্টিৰ সৰুপেটাত নতুনকৈ স্থাপিত ভৱানীপুৰ উন্নয়ন খণ্ডৰ কাৰ্যালয় স্থাপনৰ উদ্বোধনী সভাত। মন্ত্ৰী ৰঞ্জিত কুমাৰ দাসে তেওঁৰ ভাষণত কয় যে – ‘অসমৰ সকলো দুখীয়া বৃদ্ধ আৰু বিধৱাই প্ৰকৃত নিয়ম অনুসৰি পেঞ্চন লাভ কৰিব। পঞ্চায়তৰ জৰিয়তে বৃদ্ধ পেঞ্চন,বিধৱা পেঞ্চনৰ নামত হাৰাশাস্তি কৰা কাৰ্য সম্পূৰ্ণ বন্ধ হ’ব “। মন্ত্ৰী দাসে অসমত ৪৫টা নতুন উন্নয়ন খণ্ড স্থাপন হ’ব বুলিও তেওঁৰ ভাষণত উল্লেখ কৰে।সভাত ভাষণ দি ভৱানীপুৰ বিধানসভা সমষ্টিৰ বিধায়ক ফনীধৰ তালুকদাৰে কয় যে – ‘স্বাধীনতাৰ দিনৰে পৰা ভৱানীপুৰ বিধানসভা সমষ্টিত উন্নয়ন খণ্ড স্থাপন হোৱা নাছিল।অসমৰ ১২৬ টা বিধানসভা সমষ্টিৰ ভিতৰত একমাত্ৰ উন্নয়ন খণ্ডবিহীন সমষ্টি আছিল ভৱানীপুৰ বিধানসভা সমষ্টি। আজি ভৱানীপুৰ বিধানসভা সমষ্টিৰ সৰুপেটাত উন্নয়ন খণ্ডৰ কাৰ্যালয় স্থাপন হোৱাৰ লগে লগে আজিৰ দিনটো ভৱানীপুৰ বিধানসভা সমষ্টিৰ বাবে অন্য এক ইতিহাস হৈ ৰ’ব। ভৱানীপুৰ বিধানসভা সমষ্টিবাসীৰ বাবে আজি আবেগৰ বিষয়।২০২২ৰ অৰ্থাৎ নৱবৰ্ষৰ প্ৰথম ভাগতেই ভৱানীপুৰ বিধানসভা সমষ্টিত উন্নয়ন খণ্ডৰ কাৰ্যালয় স্থাপন হোৱাৰ বাবে গৌৰৱেৰে ক’ব পাৰি যে এইবাৰৰ নৱবৰ্ষ ভৱানীপুৰ বিধানসভা সমষ্টিবাসীৰ বাবে উৎকৃষ্ট নৱবৰ্ষ। সুদীৰ্ঘ দিন ধৰি একাধিক উন্নয়নৰ পৰা বঞ্চিত অসমৰ অস্তিত্ব ৰক্ষাৰ আন্দোলনৰ প্ৰথম শ্বহীদ খৰ্গেশ্বৰ তালুকদাৰৰ আত্মবলিদানেৰে ঐতিহাসিক ভৱানীপুৰ বিধানসভা সমষ্টিটোত এতিয়াৰে পৰা উন্নয়নৰ যাত্ৰা আৰম্ভ হ’ল। ৰাইজৰ হেঁপাহ-ঐতিহাসিক ভৱানীপুৰ বিধানসভা সমষ্টিৰ উন্নয়ন হ’ব লাগে। ২০২২ – ২৩ বৰ্ষৰ ভিতৰত ভৱানীপুৰ বিধানসভা সমষ্টিৰ একাধিক উন্নয়ন হ’ব আৰু ৰাইজৰ হেঁপাহ পূৰ্ণ হ’ব।অসমৰ অস্তিত্ব ৰক্ষাৰ আন্দোলনৰ প্ৰথম শ্বহীদ খৰ্গেশ্বৰ তালুকদাৰৰ আত্মাই শান্তি পাব ভৱানীপুৰ বিধানসভা সমষ্টিৰ সৰ্বদিশৰ উন্নয়ন হ’লেহে।’ দুৱৰি কাশ্যপে আত ধৰা আৰু আৰম্ভণিতে বজালী জিলা উপায়ুক্ত ভাৰত ভূষণ দেৱ চৌধুৰীয়ে আদৰণি ভাষণ দিয়া সভাত বৰপেটা জিলা পৰিষদৰ মুখ্য কাৰ্যবাহী বিষয়া মনোজ কুমাৰ চিকাৰীয়া, শালবাৰীৰ মহকুমাধিপতি লক্ষ্যজ্যোতি দাস,বিটিআৰৰ শালবাৰী সমষ্টিৰ টিচিএলচিচিৰ অধ্যক্ষ বিনোদ মুছাহাৰী,সৰুপেটা ৰাজহ চক্ৰ বিষয়া মদিৰা বেগম, ভৱানীপুৰ খণ্ড উন্নয়ন বিষয়া ভৱানী পেগু, প্ৰাক্তন বিধায়ক মনোৰঞ্জন দাস আৰু বজালীৰ বিশিষ্ট সমাজকৰ্মী নগেন চৌধুৰীয়ে অতিথিৰূপে উপস্থিত থাকে। উল্লেখ্য যে ভৱানীপুৰ বিধানসভা সমষ্টিৰ সৰুপেটাত নতুনকৈ স্থাপিত ভৱানীপুৰ উন্নয়ন খণ্ডৰ কাৰ্যালয়ৰ আনুষ্ঠানিকভাৱে উদ্বোধন কৰে মন্ত্ৰী ৰঞ্জিত কুমাৰ দাসে আৰু কাৰ্যালয়ৰ গৃহৰ দ্বাৰ উন্মোচন কৰে বিধায়ক ফনীধৰ তালুকদাৰে। ভৱানীপুৰ বিধানসভা সমষ্টিৰ বাৰখন পঞ্চায়ত আৰু সৰক্ষেত্ৰী বিধানসভা সমষ্টিৰ চাৰিখন পঞ্চায়ত মুঠ ষোল্লখন পঞ্চায়তক লৈ সৰুপেটাত নতুনকৈ ভৱানীপুৰ খণ্ড উন্নয়ন বিষয়াৰ কাৰ্যালয় স্থাপন হ’ল।

LEAVE A REPLY

Please enter your comment!
Please enter your name here