ডুবাই, ২০ জানুৱাৰী: ২০২২ চনৰ আৰম্ভণি টীম ইণ্ডিয়াৰ বাবে সুখজনক নহ’ল। দক্ষিণ আফ্ৰিকাৰ হাতত টেষ্ট শৃংখলাত পৰাজিত হোৱাৰ লগে লগে দলটো টেষ্ট ৰেংকিঙৰ শীৰ্ষ স্থানৰ পৰা অৱনমি হ’ব লগা হৈছে।এতিয়া অষ্ট্ৰেলিয়াই ভাৰতৰ স্থান দখল কৰিছে। শেহতীয়া আইচিচি টেষ্ট ৰেংকিঙত শীৰ্ষ স্থান অষ্ট্ৰেলিয়াই দখল কৰিছে।যাৰ ফলত অষ্ট্ৰেলিয়া হৈ পৰিছে বিশ্বৰ শ্ৰেষ্ঠ টেষ্ট দল। শেহতীয়াকৈ এছেজ শৃংখলাত অষ্ট্ৰেলিয়াই ইংলেণ্ডক ৪-০ত পৰাস্ত কৰিছিল। ইয়াৰ বাবে অষ্ট্ৰেলিয়াক পুৰস্কৃত কৰা হৈছে আৰু নতুন ৰেংকিঙত প্ৰথম স্থানলৈ আগবাঢ়িছে। টীম ইণ্ডিয়া আগতে শীৰ্ষস্থানত আছিল, কিন্তু এতিয়া দুটা স্থান অৱনমি হৈ তৃতীয় স্থান দখল কৰিছে। ভাৰতে দক্ষিণ আফ্ৰিকাৰ বিৰুদ্ধে টেষ্ট শৃংখলাত ২-১ত পৰাজিত হোৱাৰ ফল বহন কৰিছে। নিউজিলেণ্ড টেষ্ট ৰেংকিংত দ্বিতীয় স্থানত আছে।উল্লেখ্য যে টীম ইণ্ডিয়াই দক্ষিণ আফ্ৰিকাৰ বিৰুদ্ধে টেষ্ট শৃংখলা জয়ৰে আৰম্ভণি কৰিছিল। চেঞ্চুৰিয়ানত অনুষ্ঠিত প্ৰথমখন টেষ্টত টীম ইণ্ডিয়াই জয় লাভ কৰিছিল। কিন্তু আয়োজক দলটোৱে জোহান্সবাৰ্গ আৰু কেপ টাউনৰ দুয়োখন টেষ্টত তেওঁলোকক পৰাস্ত কৰিছিল। ইয়াৰ লগে লগে ২৯ বছৰ ধৰি দক্ষিণ আফ্ৰিকাত শৃংখলা জয়ৰ ভাৰতৰ সপোন অসম্পূৰ্ণ হৈ থাকিল। দক্ষিণ আফ্ৰিকাই টেষ্ট শৃংখলাত ভাৰতক পৰাস্ত কৰি লাভান্বিত হৈছিল আৰু দলটোৱে ১০১ ৰেটিং পইণ্টৰ সৈতে এক নম্বৰ বৃদ্ধি কৰি পঞ্চম স্থানত উপনীত হৈছে।নিউজিলেণ্ডে বাংলাদেশৰ বিৰুদ্ধে শৃংখলাটো ড্ৰ কৰি তেওঁলোকৰ দ্বিতীয় স্থান বজাই ৰাখিবলৈ সক্ষম হৈছে। দলৰ ৰেংকিঙৰ শীৰ্ষত থকা অষ্ট্ৰেলিয়াৰ ১১৯ ৰেটিং পইণ্ট আছে, নিউজিলেণ্ডৰ ১১৭। আনহাতে ভাৰতৰ ১১৬ ৰেটিং পইণ্ট আছে। এছেজ শৃংখলা ৪-০ ত বিজয়ী হৈ অষ্ট্ৰেলিয়াই টেষ্ট ৰেংকিঙৰ শীৰ্ষত উপনীত হৈছে । তেওঁলোকে বিশ্ব টেষ্ট চেম্পিয়নশ্বিপৰ পইণ্ট তালিকাত দ্বিতীয় স্থান লাভ কৰিছে। পাকিস্তান তৃতীয় আৰু দক্ষিণ আফ্ৰিকা চতুৰ্থ স্থানত আছে। বিশ্ব টেষ্ট চেম্পিয়নশ্বিপৰ পইণ্ট তালিকাত শ্ৰীলংকা প্ৰথম স্থানত আছে। আনহাতে টীম ইণ্ডিয়া পঞ্চম স্থানত আছে।শেহতীয়া চলিত ৰেংকিংত পাকিস্তান ষষ্ঠ স্থানত আছে। ইয়াৰ পিছত আছে শ্ৰীলংকা, ৱেষ্ট ইণ্ডিজ, বাংলাদেশ আৰু জিম্বাবোৱে শীৰ্ষ ১০ টেষ্ট দলত আছে।
