Gana Adhikar News

ষ্টাফ ৰিপ’ৰ্টাৰ, গুৱাহাটী, ১৮ ছেপ্টেম্বৰ ঃ সাহিত্য অকাডেমীয়ে আজি অনুবাদ সাহিত্য বঁটা ঘোষণা কৰে। অসমীয়া ভাষাৰ বাবে অনুবাদ সাহিত্য বঁটা লাভ কৰে মুখ্যমন্ত্ৰী ড০ হিমন্ত বিশ্ব শৰ্মাৰ জ্যেষ্ঠ ভাতৃ তথা সুবক্তা, কবি, অনুবাদক ড০ দিগন্ত বিশ্ব শৰ্মাই। ‘ভাৰতীয়  সংস্কৃতিৰ ভেটি’ শীৰ্ষ অনুবাদ গ্ৰন্থৰ বাবে তেওঁ এই বঁটা লাভ কৰিছে। বড়ো ভাষাত অনুবাদ বঁটা লাভ কৰিছে কামেশ্বৰ ব্ৰহ্মই। এই বঁটাপ্ৰাপকক সাহিত্য অকাডেমীৰ তৰফৰ পৰা ৫০ হাজাৰ টকাৰে পুৰস্কাৰ প্ৰদান কৰিব।

নতুন দিল্লী, ১৮ ছেপ্টেম্বৰ ঃ দেশৰ ৰাজনীতিত ১৮ ছেপ্টেম্বৰৰ দিনটোত ধুমুহা বোলে। বিজেপি আৰু কংগ্ৰেছৰ বাবে ১৮ ছেপ্টেম্বৰৰ দিনটো এক মোক্ষম আঘাত ৰূপে পৰিগণিত হৈছে। কিয়নো, বিজেপিৰ সাংসদ তথা প্ৰাক্তন কেন্দ্ৰীয় মন্ত্ৰী বাবুল সুপ্ৰিয়ই আজি আনুষ্ঠানিকভাৱে তৃণমূল কংগ্ৰেছত যোগদান কৰে। যিটো বিজেপিৰ বাবে মোক্ষম আঘাত। কিয়নো, বাবুল সুপ্ৰিয় পশ্চিমবংগৰ বিজেপিৰ এগৰাকী প্ৰখ্যাত নেতা আছিল। এইগৰাকী নেতাই আনুষ্ঠানিকভাৱে মমতা বেনাৰ্জীৰ ভতিজা অভিষেক বেনাৰ্জী আৰু জ্যেষ্ঠ নেতা ডেৰেক অ’ ব্ৰাইনৰ উপস্থিতিত টি এম চিত যোগদান কৰে। উল্লেখ্য যে বিজেপি আৰু বাবুল সুপ্ৰিয়ৰ মাজত দীৰ্ঘদিন ধৰি সংঘাত চলি আছিল বুলি সংবাদ মাধ্যমে প্ৰকাশ কৰিছে। সেইবাবেই এইগৰাকী নেতাই বিজেপি দল ত্যাগ কৰি টি এম চিত যোগদান কৰিছে। তেওঁ টি এম চিত যোগদান কৰাৰ পিছত বাবুল সুপ্ৰিয়ক বিজেপিয়ে বিশ্বাসঘাটক বুলি আখ্যা দিছে। বাবুল সুপ্ৰিয় মোদী মন্ত্ৰীসভাত কেবিনেট মন্ত্ৰীৰূপে আছিল। কিছুদিন পূৰ্বে বিজেপিৰ পৰা পদত্যাগ কৰিছিল। টি এম চিত যোগদান কৰি তেওঁ আনুষ্ঠানিকভাৱে কয় যে শীঘ্ৰে তেওঁ সাংসদ পদ ত্যাগ কৰিব। সোমবাৰে তেওঁ মমতা বেনাৰ্জীকো সাক্ষাৎ কৰিব বুলি অৱগত কৰে। ইয়াৰ পূৰ্বে কংগ্ৰেছৰ প্ৰাক্তন সাংসদ সুস্মিতা দেৱে বিজেপিত যোগদান কৰিছিল। ২০২৪ৰ লোকসভা নিৰ্বাচনৰ পূৰ্বে বহু জ্যেষ্ঠ নেতাই তৃণমূল কংগ্ৰেছত যোগদান কৰাক লৈ এই দলটো শক্তিশালী হৈ পৰিছে। ২০২৪ৰ লোকসভা নিৰ্বাচনত বিৰোধীৰ প্ৰধানমন্ত্ৰী পদৰ বাবে প্ৰবল দাবীদাৰ হৈ আছে মমতা বেনাৰ্জী। এনে সময়তেই বিজেপি আৰু কংগ্ৰেছৰ জ্যেষ্ঠ নেতাই তৃণমূল কংগ্ৰেছত যোগদান কৰি দলটোক আৰু অধিক শক্তিশালী কৰি তুলিছে। একেদৰে আজিৰ দিনটোত পঞ্জাবৰ ৰাজনীতিত এক ধুমুহা বোলে। ২০২২ৰ বিধানসভা নিৰ্বাচনৰ পূৰ্বে পঞ্জাবৰ মুখ্যমন্ত্ৰী অমৰিন্দৰ সিঙে পদত্যাগ কৰে। দীৰ্ঘদিন ধৰি পঞ্জাব কংগ্ৰেছত আভ্যন্তৰীণ সংঘাত চলি আছিল। সেই সংঘাতৰ পৰিণতিস্বৰূপে আজি পঞ্জাবৰ মুখ্যমন্ত্ৰীগৰাকীয়ে আনুষ্ঠানিকভাৱে পদত্যাগ কৰে আৰু আন দলত যোগদানৰ এক ইংগিত প্ৰদান কৰে। আজি পুৱাৰ ভাগত বিধায়িনী বৈঠক অনুষ্ঠিত হৈছিল। এই বিধায়িনী বৈঠকৰ পিছতেই তেওঁ ৰাজ্যপালক সাক্ষাৎ কৰি পদত্যাগ-পত্ৰ অৰ্পণ কৰে। অমৰিন্দৰ সিঙৰ পুত্ৰ নন্দিদৰ সিঙে টুইটাৰৰ জৰিয়তে অৱগত কৰে যে ৰাজ্যপাল বানোৱাৰীলাল পুৰোহিতক সাক্ষাৎ কৰি পিতৃ কেপ্টেইন অমৰিন্দৰ সিঙে পদত্যাগ-পত্ৰ অৰ্পণ কৰিছে। তেওঁ লগতে কয় যে সমগ্ৰ মন্ত্ৰীসভাই পদত্যাগ-পত্ৰ অৰ্পণ কৰে। ২০২২ৰ বিধানসভা নিৰ্বাচনৰ পূৰ্বে পঞ্জাব কংগ্ৰেছত চলা এনে আভ্যন্তৰীণ সংঘাতে এতিয়া দলটোলৈ অশনি সংকেত কঢ়িয়াই আনিছে। অমৰিন্দৰ সিঙে মুখ্যমন্ত্ৰীৰ পদৰ পৰা পদত্যাগৰ পিছত কয় যে এবাৰ নহয়, দুবাৰ নহয়, তৃতীয়বাৰলৈ মোৰ নেতৃত্বৰ ওপৰত সন্দেহ প্ৰকাশ কৰা হৈছে। মোক অপমান কৰা হৈছে। সেইবাবে মই পদত্যাগ কৰিছো। এতিয়া নেতৃত্বই যাকে মুখ্যমন্ত্ৰীৰ আসনত বহুৱাব বিচাৰে বহুৱাব পাৰে। তেওঁ লগতে ভৱিষ্যতৰ ৰাজনীতি সম্পৰ্কত কয় যে সহযোগীসকলৰ সৈতে আলোচনা কৰি ইয়াৰ সিদ্ধান্ত লোৱা হ’ব।

ষ্টাফ ৰিপ’ৰ্টাৰ, মঙলদৈ, ১৮ ছেপ্টেম্বৰ ঃ ধৰ্মীয় পৰিচয় নহয়, ভূমিপুত্ৰ গৰিয়া-মৰিয়া-দেশীসকলক জনগোষ্ঠীয় পৰিচয় প্ৰদানৰ দাবীত আজি সদৌ অসম গৰিয়া-মৰিয়া-দেশী জাতীয় পৰিষদৰ দৰং জিলা সমিতিয়ে মঙলদৈত ৰূপায়ণ কৰে মানৱ শৃংখল কাৰ্যসূচীৰ। সদৌ অসম গৰিয়া-মৰিয়া-দেশী জাতীয় পৰিষদৰ কেন্দ্ৰীয় সমিতিৰ আহ্বান মৰ্মে আজি দিনৰ এক বজাত ৰূপায়িত মানৱ শৃংখল কাৰ্যসূচীৰ অন্তত দৰং জিলাৰ উপায়ুক্তৰ জৰিয়তে মুখ্যমন্ত্ৰী ড০ হিমন্ত বিশ্ব শৰ্মালৈ এখনি স্মাৰক-পত্ৰ প্ৰেৰণ কৰা হয়। কাৰ্যসূচীত অংশগ্ৰহণ কৰি সদৌ অসম গৰিয়া-মৰিয়া-দেশী জাতীয় পৰিষদৰ মুখ্য উপদেষ্টা চহিৰ ভূঞাই কয় যে কোচ, কলিতা, বড়ো, ৰাভা, মৰাণ, মটক, ডিমাছা, কাৰ্বিসকলৰ দৰেই গৰিয়া-মৰিয়া-দেশীসকলকো জনগোষ্ঠীয় পৰিচয় লাগে। ভূঞাই আৰু কয় যে গৰিয়া-মৰিয়া-দেশীসকলক ‘খিলঞ্জীয়া মুছলমান’, ‘অসমীয়া মুছলমান’ বুলি  পৰিচয় দিয়া দেখা যায় যদিও লক্ষণীয়ভাৱে খিলঞ্জীয়া হিন্দু, খিলঞ্জীয়া খ্ৰীষ্টান বুলি পৰিচয় দিয়া দেখা নাযায়। বৰ্তমান গৰিয়া-মৰিয়াসকল অস্তিত্বৰ সংকটত ভুগিবলগীয়া হৈছে বুলি উল্লেখ কৰি অচিৰেই ভূমিপুত্ৰৰ পৰিচয় দিব লাগে বুলি তেওঁ দাবী কৰে। ইপিনে, বিধানসভাত গৰিয়া-মৰিয়াসকলৰ পক্ষত বলিষ্ঠ ভূমিকা পালন কৰাৰ বাবে মুখ্যমন্ত্ৰী ড০ হিমন্ত বিশ্ব শৰ্মাৰ শলাগ লৈছে পৰিষদৰ মুখ্য উপদেষ্টাগৰাকীয়ে আৰু অনাগত দিনত গৰিয়া-মৰিয়া-দেশীসকলৰ সমস্যা শীঘ্ৰেই সমাধান হ’ব বুলি তেওঁ  আশা প্ৰকাশ কৰে।  দৰং জিলা উপায়ুক্ত কাৰ্যালয়ৰ সন্মুখত ১৫নং ৰাষ্ট্ৰীয় ঘাইপথত আয়োজিত মানৱ শৃংখল কাৰ্যসূচীত পৰিষদৰ মুখ্য উপদেষ্টা চহিৰ ভূঞা, পৰিষদৰ দৰং জিলা সমিতিৰ কাৰ্যকৰী সভাপতি খাইৰুল হুছেইন অধিকাৰী, সাধাৰণ সম্পাদকদ্বয় মইনুল হক শইকীয়া, ছফিকুল ইছলাম, সম্পাদকদ্বয় চাহাবুদ্দিন আহমেদ, মহিবুল হক, পৰিষদৰ মঙলদৈ নগৰ সমিতিৰ সম্পাদকদ্বয় কমৰুল হামিদ, চাহিল ইৰফান, জ্যেষ্ঠ সদস্য আৰফান আলী প্ৰমুখ্যে দৰং জিলা গৰিয়া-মৰিয়া-দেশী জাতীয় পৰিষদৰ শতাধিক নেতা, কৰ্মী-সদস্যই অংশগ্ৰহণ কৰে।

ষ্টাফ ৰিপ’ৰ্টাৰ, তেজপুৰ, ১৮ ছেপ্টেম্বৰ ঃ অসমবাসীৰ বহু প্ৰত্যাশিত তথা প্ৰাক্তন মুখ্যমন্ত্ৰী সৰ্বানন্দ সোণোৱালৰ সপোনৰ প্ৰকল্প ব্ৰহ্মপুত্ৰৰ দুয়োপাৰে এক্সপ্ৰেছ হাইৱে নিৰ্মাণৰ বিষয়ে গমকে নাপায় কেন্দ্ৰীয় জলশক্তি মন্ত্ৰী গজেন্দ্ৰ সিং শ্বেখাৱটে। উল্লেখ্য যে কেন্দ্ৰীয় চৰকাৰৰ অধীনস্থ তেজপুৰস্থিত উত্তৰপূব আঞ্চলিক জল আৰু ভূমি ব্যৱস্থাপনা প্ৰতিষ্ঠান চমুকৈ ‘নেৰিৱালম’ৰ  সভাপতিৰ দায়িত্ব বহন কৰা কেন্দ্ৰীয় মন্ত্ৰীগৰাকীয়ে কালি প্ৰথমবাৰৰ পৰিদৰ্শন কৰে গৱেষণামূলক প্ৰতিষ্ঠানটো। প্ৰকাশ যে  ২০১৭ চনত তদানীন্তন কেন্দ্ৰীয় পথ-পৰিবহণ মন্ত্ৰী নীতিন গাডকাৰীয়ে ব্ৰহ্মপুত্ৰৰ দুয়োপাৰে এক্সপ্ৰেছ হাইৱে নিৰ্মাণৰ পৰিকল্পনাৰ কথা ঘোষণা কৰিছিল । এই সন্দৰ্ভত কালি তেজপুৰত কেন্দ্ৰীয় জলশক্তি মন্ত্ৰী শ্বেখাৱটক সাংবাদিকে সোধা প্ৰশ্নোত্তৰত বিষয়টোৰ সম্পৰ্কত অজ্ঞতা প্ৰকাশ কৰি সংশ্লি­ষ্ট বিভাগেহে জানিব বুলি তাৎপৰ্যপূৰ্ণ মন্তব্য কৰে। তদুপৰি, শীঘ্ৰে নামনি সোৱণশিৰি জলবিদ্যুৎ প্ৰকল্পৰ কাম সমাপ্ত হ’ব বুলি কেন্দ্ৰীয় মন্ত্ৰীগৰাকীয়ে সদম্ভে ঘোষণা কৰাৰ লগতে চীনে ব্ৰহ্মপুত্ৰৰ গতিপথ সলনি কৰাৰ পৰিকল্পনা অব্যাহত ৰাখিছে আৰু তাত কেন্দ্ৰীয় চৰকাৰে সতৰ্ক দৃষ্টি ৰখা বুলিও কয়। উল্লেখ্য যে তেজপুৰস্থিত প্ৰতিষ্ঠানটো পৰ্যবেক্ষণ কৰাৰ লগতে কেন্দ্ৰীয় মন্ত্ৰীগৰাকীয়ে এক অনুষ্ঠানত ভাৰ্চুৱেল মাধ্যমেৰে অংশগ্ৰহণ কৰি ৰজা জয়মাল ৰাথোৰৰ নামত ডাক টিকটো আনুষ্ঠানিকভাৱে উন্মোচন কৰে। আনহাতে, কেন্দ্ৰীয় মন্ত্ৰীগৰাকীৰ স’তে নেৰিৱালমত উপস্থিত হোৱা সাংসদ কামাখ্যা প্ৰসাদ তাছাই এক্সপ্ৰেছ হাইৱে সন্দৰ্ভত কৌশলপূৰ্ণ মন্তব্য কৰি কয় যে এসময়ত আমি আমাৰ ধাৰণাসমূহ দাঙি ধৰিছিলোঁ ৰাইজৰ সন্মুখত। এই ধাৰণাসমূহ এদিন কাৰ্যকৰী কৰা হ’ব। কিন্তু কালি কেন্দ্ৰীয় জলশক্তি মন্ত্ৰীগৰাকীয়ে বিষয়টোত অজ্ঞতা প্ৰকাশ কৰাৰ সন্দৰ্ভত সাংসদ তাছাই ৰাজ্য চৰকাৰে নিশ্চিতভাৱে পৰিকল্পনাটোৰ বিষয়ে কেন্দ্ৰক অৱগত কৰিব বুলি কয়। সাংসদগৰাকীয়ে প্ৰসংগক্ৰমে অখিল গগৈ মূৰৰ কামোৰণি হোৱাৰ প্ৰশ্নই নুঠে, অখিল গগৈ কোনোকাৰণতে ফেক্টৰ নহয় বুলি মন্তব্য কৰে। ৰাইজৰ দলৰ শীৰ্ষনেতা তথা বিধায়ক অখিল গগৈ সন্দৰ্ভত এনেদৰে মন্তব্য কৰি সাংসদ কামাখ্যা প্ৰসাদ তাছাই আগন্তুক উপ-নিৰ্বাচনত বিজেপিয়ে আটাইকেইখন আসনতে জয়লাভ কৰাটো লিশ্চিত বুলি দাবী কৰে। তাছাই কংগ্ৰেছী পদত্যাগী বিধায়ক বিশ্বাসঘাতক হ’ব নোৱাৰে বুলি মন্তব্য কৰাৰ লগতে মৰিয়নি-থাওৰা এই দুই সমষ্টি বিজেপিৰ দখলতে আছে বুলি উল্লেখ কৰি ৰাইজে বিজেপিকে পূৰ্ণ সমৰ্থন আগবঢ়াব বুলি মন্তব্য কৰে। তদুপৰি কংগ্ৰেছে এখনো আসন নাপায় বুলি উল্লেখ কৰি তাছাই অনাগত দিনত কংগ্ৰেছক কোনেও ফেক্টৰ হিচাপে সৃষ্টি কৰিব নোৱাৰে বুলি দাবী কৰে।

গুৱাহাটী, ১৮ ছেপ্তেম্বৰ : মুখ্যমন্ত্ৰী ড০ হিমন্ত বিশ্ব শৰ্মাই আজি শিলচৰ চিকিৎসা মহাবিদ্যালয় হাস্পতালত শিশুৰ বাবে ৪০টা আই চি ইউ আৰু প্ৰাপ্তবয়স্কৰ বাবে...

গুৱাহাটী, ১৮ ছেপ্টেম্বৰ ঃ মুখ্যমন্ত্ৰী ড০ হিমন্ত বিশ্ব শৰ্মাই আজি শিলচৰৰ শ্ৰীকোণাত উপস্থিত হৈ বৰাক উপত্যকাৰ মিনি সচিবালয় চৌহদৰ নিৰ্মাণকাৰ্য পৰিদৰ্শন কৰে। পৰিদৰ্শন কালত মুখ্যমন্ত্ৰীয়ে প্ৰকল্পটোৰ কাম-কাজৰ অগ্ৰগতিৰ লগতে আনুষংগিক বিভিন্ন দিশৰ বুজ লয় ।ইয়াৰ পিছত মুখ্যমন্ত্ৰীয়ে কয় যে ৰাজ্য চৰকাৰে মিনি সচিবালয়ৰ বাবে ইতিমধ্যে ১১৬ কোটি টকা আবণ্টন দিছে আৰু ৩ বছৰৰ ভিতৰত ইয়াৰ নিৰ্মাণকাৰ্য সম্পূৰ্ণ হৈ উঠিব বুলি আশা কৰা হৈছে। তেওঁ কয় যে মিনি সচিবালয়ে বৰাক উপত্যকাৰ প্ৰশাসনিক কাৰ্যকলাপত যথেষ্ট সহায় কৰিব আৰু সৰু-সুৰা চৰকাৰী কাম-কাজৰ বাবে উপত্যকাটোৰ জনসাধাৰণৰ গুৱাহাটীলৈ অপ্ৰয়োজনীয় ভ্ৰমণৰ প্ৰয়োজনীয়তা নাইকিয়া কৰিব। এই সচিবালয় নিৰ্মাণ হৈ উঠিলে উপত্যকাটোৰ চৰকাৰী আঁচনি আৰু প্ৰকল্পসমূহৰ দ্ৰুত ৰূপায়ণ সম্ভৱ হৈ উঠিব আৰু ৰাইজেও তেওঁলোকৰ কামবোৰ পলম নকৰাকৈ সম্পন্ন কৰাৰ সুযোগ লাভ কৰিব। আজিৰ পৰিদৰ্শন কালত মুখ্যমন্ত্ৰীৰ সৈতে পৰিৱেশ আৰু বন, আবকাৰী, মীন আদি বিভাগৰ মন্ত্ৰী পৰিমল শুক্লবৈদ্য, সাংসদ ড০ ৰাজদীপ ৰয়, পল্লৱ লোচন দাস, বিধায়ক দ্বিপায়ন চক্ৰৱৰ্তী, মিহিৰ কান্তি সোম আৰু কৌশিক ৰায়ো উপস্থিত আছিল। ইয়াৰ পাছত মুখ্যমন্ত্ৰীয়ে শিলচৰ-আইজল সংযোগী ৩০৬নং ৰাষ্ট্ৰীয় ঘাইপথ আৰু শিলচৰ-কৰিমগঞ্জ সংযোগী ৩৭নং ৰাষ্ট্ৰীয় ঘাইপথক সংযোগ কৰি নিৰ্মাণকাৰ্য চলি থকা শিলচৰ বাইপাছ পৰিদৰ্শন কৰে। তেওঁ ৰাষ্ট্ৰীয় ঘাইপথ আন্তঃগাঁথনি উন্নয়ন নিগম লিমিটেড আৰু লোকনিৰ্মাণ (পথ) বিভাগৰ জ্যেষ্ঠ বিষয়াসকলৰ পৰা পথটোৰ কাম-কাজৰ অগ্ৰগতিৰ বুজ লোৱাৰ লগতে উপত্যকাটোত যান-বাহনৰ চলাচল সুগম কৰি তোলাৰ স্বাৰ্থত বাইপাছটোৰ নিৰ্মাণৰ কাম সোনকালে সম্পূৰ্ণ কৰাৰ বাবে তাৎক্ষণিক পদক্ষেপ গ্ৰহণ কৰিবলৈ বিষয়াসকলক নিৰ্দেশ দিয়ে। আনহাতে, আজি পুৱা শিলচৰত উপস্থিত হৈ মুখ্যমন্ত্ৰীয়ে চহৰখনৰ ৰংপুৰ জিৰো পইণ্টত থকা প্ৰাক্তন প্ৰধানমন্ত্ৰী ‘ভাৰত ৰত্ন’ অটল বিহাৰী বাজপেয়ীৰ প্ৰতিমূৰ্তিত শ্ৰদ্ধাঞ্জলি জ্ঞাপনেৰে দুদিনীয়া বৰাক উপত্যকা ভ্ৰমণসূচী আৰম্ভ কৰে শ্ৰদ্ধাঞ্জলি জ্ঞাপনৰ সময়ত মুখ্যমন্ত্ৰীয়ে দেশৰ প্ৰতিপ্ৰাক্তন প্ৰধানমন্ত্ৰীগৰাকীৰ অৱদানৰ কথা শ্ৰদ্ধাৰে স্মৰণ কৰাৰ লগতে মহান নেতাজনৰ আত্মাৰ চিৰশান্তিৰ বাবে ভগৱানৰ ওচৰত প্ৰাৰ্থনা জনায়।

ষ্টাফ ৰিপ’ৰ্টাৰ, গুৱাহাটী, ১৮ ছেপ্তেম্বৰ : অসমৰ জীয়ৰী তথা দেশৰ গৌৰৱ লাভলীনা বৰগোহাঁইৰ বক্সিং গ্লোভ্‌ছৰ মূল্য্য১.৯ কোটি টকা। টকিঅ’ অলিম্পিকত ব্ৰঞ্জৰ পদক লাভ...

গণ বাৰ্তা বিশেষ, গোৱালপাৰা, ১৮ ছেপ্তেম্বৰ : নামনি অসমৰ সাতখন জিলাত টেট পৰীক্ষা কেন্দ্ৰ স্থাপন নকৰা আৰু বিদ্যালয়-মহাবিদ্যালয়সমূহত ছাত্ৰ-ছাত্ৰীসকলৰ নামভৰ্তি সুনিশ্চিত নকৰাৰ প্ৰতিবাদত...

গণ বাৰ্তা, যোৰহাট, ১৮ ছেপ্তেম্বৰ: ‘প্ৰধানমন্ত্ৰী নৰেন্দ্ৰ মোদীৰ জন্মদিন ২০ দিন ধৰি পালনৰ বাবে যি কাৰ্যসূচী বিজেপি দলে লৈছে ই স্বাভাৱিকভাৱে সকলোকে চিন্তিত...

গণবাৰ্তা,হাউলী,১৬ চেপ্তেম্বৰঃ অসম ক্ৰিকেট দলৰ ১৯ বছৰ অনুৰ্ধ শাখালৈ নিৰ্বাচিত হৈছে নামনি অসমৰ বৰপেটা জিলাৰ বৰপেটাৰোডৰ আদিত্য বিক্ৰম তেৱাৰী ৷ সেইমৰ্মে তেওঁ অহা ২৮...