গণ বাৰ্তা, মুম্বাই, ৩ মাৰ্চ:- মহাৰাষ্ট্ৰ চৰকাৰে বুধবাৰে মুম্বাই আৰু পুনেত ২৬ মাৰ্চৰ পৰা আৰম্ভ হ’বলগীয়া ইণ্ডিয়ান প্ৰিমিয়াৰ লীগৰ (আই পি এল) আগন্তুক খেলসমূহৰ বাবে সম্পূৰ্ণ ক’ভিড টিকাকাৰণ কৰা দৰ্শকসকলক ষ্টেডিয়ামত প্ৰৱেশ কৰিবলৈ অনুমতি দিছে, কিন্তু এই সংখ্যা ষ্টেডিয়ামৰ ক্ষমতাৰ ২৫ শতাংশ হ’ব। জাৰি কৰা এক চৰকাৰী বিবৃতিত ৰাজ্য চৰকাৰে কয় যে ক’ভিড-১৯ ৰ ঘটনা হ্ৰাস হোৱাৰ পৰিপ্ৰেক্ষিতত দৰ্শকৰ সংখ্যা ২৫ শতাংশলৈ সীমাবদ্ধ কৰা হৈছে আৰু কেৱল সম্পূৰ্ণ টিকাকৰণ কৰা দৰ্শককহে ষ্টেডিয়ামত প্ৰৱেশ কৰিবলৈ অনুমতি দিয়া হ’ব। বুধবাৰে বিচিচিআই (ভাৰতীয় ক্ৰিকেট নিয়ন্ত্ৰণ ব’ৰ্ড) আৰু মুম্বাই ক্ৰিকেট এছ’চিয়েশ্যনৰ (এমচিএ) সৈতে আই পি এল পৰিচালনা সন্দৰ্ভত এখন বৈঠকৰ পিছত মহাৰাষ্ট্ৰ চৰকাৰে এই সিদ্ধান্ত গ্ৰহণ কৰে। এইবাৰ, ১০ টা দলে আইপিএলত অংশগ্ৰহণ কৰিব। ৰাজ্য চৰকাৰৰ মন্ত্ৰী – আদিত্য ঠাকৰে আৰু একনাথ চিন্দেৰ লগতে এমচিএৰ মুৰব্বী বিজয় পাটিল আৰু শীৰ্ষ পৰিষদৰ সদস্য অঞ্জিক্য ৰায়ক আৰু অভয় হাদাপ, কোষাধ্যক্ষ জগদীশ আচৰেকাৰ বৈঠকত উপস্থিত আছিল।বৈঠকৰ পিছত আদিত্য ঠাকৰেয়ে কেইবাটাও টুইটযোগে কয়, ‘আইপিএল সুচাৰুৰূপে পৰিচালনা নিশ্চিত কৰিবলৈ মন্ত্ৰী একনাথ চিন্দেজী আৰু মই মুম্বাই, থানে আৰু নৱী মুম্বাইৰ পৌৰ নিগম আৰু আৰক্ষী বিষয়াসকলৰ সৈতে আইপিএল, বিচিচিআইৰ সৈতে এক যুটীয়া বৈঠক তৈয়াৰ কৰিছিলো। মহাৰাষ্ট্ৰৰ মুখ্যমন্ত্ৰী উদ্ধৱ ঠাকৰেৰ পুত্ৰইও কৈছিল যে ৰাজ্যখনৰ উপ মুখ্যমন্ত্ৰীয়ে শীঘ্ৰেই পুনেত একেধৰণৰ বৈঠক অনুষ্ঠিত কৰিব।’ মহাৰাষ্ট্ৰত আইপিএল অনুষ্ঠিত হলে নিশ্চিত হয় যে এইবাৰৰ খেলসমূহ বিদেশত অনুষ্ঠিত নহ’ব। অৰ্থনীতিৰ ক্ষেত্ৰত মহাৰাষ্ট্ৰ আৰু দেশৰ বাবে ই এক ডাঙৰ উৎসাহ, ক্ৰিকেট প্ৰেমীসকলৰ মনোবল আৰু আবেগ বৃদ্ধি কৰে। আগতে প্ৰকাশ পাইছিল যে সকলো আই পি এল দলে ১৪ বা ১৫ মাৰ্চৰ পৰা অনুশীলন আৰম্ভ কৰিব যাৰ বাবে ইয়াত পাঁচটা অনুশীলন স্থান চিনাক্ত কৰা হৈছে। উল্লেখ্য যে আইপিএল ২৬ মাৰ্চত আৰম্ভ হ’ব আৰু জানিব পৰা গৈছে যে মুম্বাই ক্ৰিকেট এছ’চিয়েশ্যনৰ (এমচিএ) বান্দ্ৰা কুৰ্লা কমপ্লেক্স, থানেৰ এমচিএ ষ্টেডিয়াম, ড০ ডি ৱাই পাটিল বিশ্ববিদ্যালয় গ্ৰাউণ্ড, চিচিআই (ভাৰতীয় ক্ৰিকেট ক্লাব) থকা ফুটবল খেলপথাৰ আৰু ঘানচোলিৰ ৰিলায়েন্স কৰ্পোৰেট পাৰ্ক খেলপথাৰক অনুশীলন স্থান হিচাপে চিনাক্ত কৰা হৈছে। খেলুৱৈসকল ৮ মাৰ্চৰ পৰা ইয়াত উপস্থিত হ’ব বুলি আশা কৰা হৈছে। লগতে জানিব পৰা গৈছে যে সকলো অংশীদাৰে মুম্বাই পোৱাৰ ৪৮ ঘণ্টা আগতে আৰটি-পিচিআৰ পৰীক্ষা কৰিব লাগিব। খেলুৱৈসকলৰ থকাৰ বাবে মুম্বাইত ১০ খন আৰু পুনেত দুখন হোটেল বুকিং কৰা হৈছে। এইটোও জানিব পৰা গৈছে যে খেলুৱৈসকলে তেওঁলোকৰ জৈৱ-সুৰক্ষিত পৰিৱেশত (বায়-ববলত) প্ৰৱেশ কৰাৰ আগতে তিনিৰ পৰা পাঁচ দিন পৃথকে থাকিব লাগিব। আইপিএলৰ লীগ পৰ্যায়ৰ খেলসমূহ মুম্বাই আৰু পুনেত অনুষ্ঠিত হ’ব।
