Home গুৱাহাটী দিছপুৰ প্ৰেছ ক্লাবৰ উদ্যোগত পুলিন্দ্ৰ দেৱ শৰ্মাসহ ১৬ গৰাকী ক’ভিড যোদ্ধাক সম্বৰ্ধনা

দিছপুৰ প্ৰেছ ক্লাবৰ উদ্যোগত পুলিন্দ্ৰ দেৱ শৰ্মাসহ ১৬ গৰাকী ক’ভিড যোদ্ধাক সম্বৰ্ধনা

481
0

গণবাৰ্তা ,গুৱাহাটী, ৫ ছেপ্টেম্বৰ: দিছপুৰ প্ৰেছ ক্লাবে আজি কৰ’না অতিমাৰীৰ সময়ত মানৱ সেৱাৰ্থে অহোপুৰুষাৰ্থ কৰা ৰাজ্যৰ বহু বিশিষ্ট লোকক সন্মান জনায়। প্ৰেছ ক্লাবৰ সভাপতি নৰেন হাজৰিকাৰ সভাপতিত্বত অনুষ্ঠিত গাম্ভীৰ্যপূৰ্ণ অনুষ্ঠানত অসম সাহিত্য সভাৰ প্ৰাক্তন সভাপতি ধ্ৰুৱজ্যোতি বৰা, প্ৰাক্তন আৰক্ষী আয়ুক্ত প্ৰদীপ শালৈ, বিশিষ্ট সমাজকৰ্মী শংকৰ দাস, জ্যেষ্ঠ সাংবাদিক বৈকুন্ঠ গোস্বামী বিশিষ্ট অতিথি হিচাপে উপস্থিত থাকে। দিছপুৰ প্ৰেছ ক্লাৱৰ তৰফৰ পৰা গুৱাহাটী চিকিৎসা মহাবিদ্যালয়ৰ অধ্যক্ষ ডা: অচ্যুৎ চন্দ্ৰ বৈশ্য, অধীক্ষক ডা: অভিজিৎ শৰ্মা, নগৰ আৰু গাওঁ পৰিকল্পনা অসমৰ মুখ্য অভিযন্তা দেৱজিৎ দাস, জনস্বাস্থ্য কাৰিকৰী বিভাগৰ মুখ্য অভিযন্তা বিশ্বদ্বীপ দাস, কেমিষ্ট এণ্ড ড্ৰাগিষ্টছ এছ’চিয়েশ্যন অৱ আছামৰ সভাপতি এন এল আগৰৱাল আৰু জিতু বৰ্মন, সমাজকৰ্মী ৰবী ছৌধুৰী, বিধানসভা স্বাস্থ্য কেন্দ্ৰৰ ভেষজ বিষয়া সুধীৰ চন্দ্ৰ সাহা, ডি চি পি শুভ্ৰজ্যোতি বৰা, সাংবাদিক পুলিন্দ্ৰ দেৱ শৰ্মা, কৌশিক কুমাৰ ডেকা, বলোৰাম দাস, জয়ন্ত কুমাৰ দাস, দিব্যজ্যোতি ৰাভা, সমাজকৰ্মী মুন আলী, বাতৰি বিতৰক ভৱেন বৰ্মন ক সম্বৰ্ধনা জনায়। সম্বৰ্ধনা গ্ৰহন কৰি ডা: অচ্যুৎ বৈশ্যই কয় যে চিকিৎসকৰো এখন হৃদয় আছে, একেই আত্মাৰ মানুহ। ক’ভিড পৰিস্থিতিত জি এম চি এইছত ক’ভিড ৰোগীক অকনো কৃপনালি নকৰাকৈ চিকিৎসা আগবঢ়োৱা হৈছে। সাধাৰন ৰোগীকো সমানেই সেৱা আগবঢ়াইছে চিকিৎসকে। অসম সাহিত্য সভাৰ প্ৰাক্তন সভাপতি ধ্ৰুৱজ্যোতি বৰাই দিছপুৰ প্ৰেছ ক্লাৱৰ প্ৰচেষ্টাৰ শলাগ লয় আৰু অতিমাৰীৰ সময়ত চিকিৎসক, নাৰ্চ, স্বাস্থ্যকৰ্মীকে ধৰি সন্মুখৰ পৰা আন সকলোৱে আগবঢ়োৱা সেৱাৰ কথা উল্লেখ কৰে। বিশিষ্ট সমাজকৰ্মী শংকৰ দাসে সাৰুৱা ভাষনত কয় যে বগা ৰুমাল এখনত সৰু দাগ এটা থাকিলেও বহুতে দাগটোৰ প্ৰতিহে লক্ষ্য কৰে। আমি দুৰ্যোগ, দু:সময়ত মানৱ কল্যানৰ হকে কাম কৰা সকলক উদ্গনি যোগাব লাগিব। দিছপুৰ প্ৰেছ ক্লাৱে এই কাম কৰিছে।

LEAVE A REPLY

Please enter your comment!
Please enter your name here